Ledikasion Artistik e kiltirel dan Moris bizin okip enn plas inportan dan devlopman bann zenn, e bizin nepli relege li an segon plan deryer bann size akademik tradisionel. Ledikasion Artistik e Kiltirel pa zis ankouraz kreativite, me li osi ranforsi koneksion bann zenn avek lidantite kiltirel ris e divers nou pei. Anplis, ledikasion Artistik e Kiltirel zwe enn rol krisial dan konstriksion enn pei. Li kontribie boukou dan formasion bann sitwayin, devlopman sosiete, e koezion nasional. Zordi, ledikasion lar li prezan depi lekol primer, me so linportans varye depi enn lekol ziska enn lot. Aprantisaz mizikal li integre dan program lekol me dan enn fason restrin e varyab depandan lor bann lekol ki ena enn infrastriktir ek bann resours adekwa. Expozision a lamizik klasik, kontanporen e tradisionel (kouma nou sega) li esansiel pou konpran diversite kiltirel nou pei. Moris ena plizir institision e plizir linisiativ ki konsakre a ledikasion Artistik e Kiltirel. Notaman Konservatwar Nasional Lamizik François Mitterrand ki enn parmi bann institision prinsipal pou ledikasion lamizik e ki ofer formasion dan lamizik klasik e osi organiz bann konser kot bann zenn talan kapav zwe. Linstiti Mahatma Gandhi (MGI) li osi enn gran sant pou ansegn bann lar Indien dan Moris kot parmi ena lamizik indien, ladans (bharatanatyam), teat ek lar viziel. Li zwe enn rol krisial dan prezervasion ek transmision patrimwann kiltirel Indien dan Moris. Ena osi plizir ONG (ABAIM, Vent d’un Rêve, Atelier Mo’Zar, etc.) ki travay pou promouvwar akse a bann lar dan bann kartie prioriter, par exanp atraver bann latelie, bann kour, bann proze artistik ouswa bann festival lamizik. Sa bann linisiativ-la ed boukou pou demokratiz akse a ledikasion. Me mem si ledikasion Artistik e Kiltirel rekonet internasionalman pou so linportans, li pe kontinie fer fas plizir defi dan Moris, notaman mank resours. Boukou lekol, sirtou dan rezion riral, pena ase resours (materyel, profeser spesialize, infrastriktir) pou ofer enn ledikasion lar de kalite. Ena enn nesesite formasion profeser parski profeser forme spesifikman dan lar ankor rar dan Moris, seki rann li difisil pou integre ledikasion lar dan tou bann etablisman Moris. Ena osi persepsion de linportans lar ki souvan konsidere kouma mwins prioriter ki bann size akademik e se ki fer ki limit zot plas dan program edikatif. Sepandan, bann zefor pe fer pou sanz sa persepsion-la par met lanfaz lor bann benefis lar pou devlopman personel ek intelektyel bann zenn. Me li al boukou pli lwin ki sa e se seki nou pe sey fer ar lasosiasion Moris Orkestra a traver nou bann Akademi Lorkes dan Moris e osi a traver nou proze VIZION 2033 ki ena pou obzektif met an plas enn lorkes Sinfonik dan Moris disi 2033, tou an forman bann mizisien o metier dorkes me osi a lansegnman mizikal. Sof ki nou lavwa depi nou kreasion an 2017 pa pe tande. Inn ler pou rekonet linportans ledikasion Artistik e Kiltirel dan Moris. Bann politik nepli kav inior nou lanbision, nou langazman, nou devouman pou bann zenn morisien. Nou swete ki prosin Gouvernman, an partenarya avek bann akter prive e internasional, ed nou ranforsi sa ledikasion-la an integran ankor plis lar dan program skoler, an soutenan bann proze artistik e an organizan bann evennman ki met an evidans talan nou bann zenn.
Comments